काठमाडौँ । इसेवाको प्रमुख कार्यकारी अधिकृत (सिइओ) जगदिश खड्का इसेवाबाट बाहिरिएका छन् । इसेवाले नयाँ सिइओमा निरज शर्मालाई नियुक्त गरेसँगै खड्का इसेवाबाट बाहिरिएका हुन् ।
पूरा कार्यकाल सिइओका रुपमा काम गरे पनि खड्काको बहिर्गमन सुखद् भने रहेन ।
२०७९ असोज १२ गते इसेवाको सिइओ नियुक्त भएका खड्काको कार्यकालमा इसेवा बिग्रिरह्यो । प्रायः दिनहुँ बिग्रिरहने इसेवा खड्काको कार्यकालमा कुल ३ सय ७२ पटक बिग्रियो । तर, इसेवा सुध्रिएन ।
खड्काकै कार्यकालमा इसेवामा गज्जब काम गरिरहेका आईटीका थुप्रै कर्मचारीले जागिर छोडे । अर्कोतर्फ इसेवाको संस्थागत सुशासन पनि खड्काकै कार्यकालमा खस्किएको स्वयम् संस्थाका कर्मचारीहरु बताउँछन् ।
केही समयअघि इसेवासहित डिजिटल वालेटहरुमा नेपाल राष्ट्र बैंकले गरेको ‘स्पेशल इन्सपेक्सन’ले पनि इसेवामा थुप्रै कैफियतहरु फेला पारेको थियो ।
यता खड्काकै कार्यकालमा सेवाग्राहीमाझ इसेवाको छवि नराम्रोसँग बिग्रिएको थियो । इसेवाको झुर सेवाकै कारण लाखौँ इसेवा प्रयोगकर्ता इसेवाका सिफ्ट भएको स्वयम् इसेवाका कर्मचारीहरुले बताएका छन् । तर, पनि इसेवा नसुध्रिएपछि अन्ततः खड्कालाई सिइओमा नदोहोराउने निर्णय गर्दै इसेवाको सञ्चालक समितिले नयाँ सिइओमा निरज शर्मालाई नियुक्त गरेको छ ।
यता अरु बेलाजस्तै यो समाचार तयार गर्दा समेत खड्काको धारणा लिन खोज्दा उनी सम्पर्कमै आएनन् ।
