काठमाडौं । नेपालको सफ्टवेयर तथा सूचना प्रविधि क्षेत्रका कम्पनीहरूको छाता संगठन ‘नेपाल एसोसिएसन फर सफ्टवेयर एन्ड आईटी सर्भिसेस कम्पनीज’ (नास-आईटी) को चौथो वार्षिक साधारणसभाले दीपेन चापागाईंको अध्यक्षतामा नयाँ कार्यसमिति चयन गरेको छ । ललितपुरमा सम्पन्न उक्त सभाले आगामी सन् २०२६-२०२९ का लागि ९ सदस्यीय सञ्चालक समिति (बोर्ड) निर्वाचित गरेको हो ।
नवनिर्वाचित बोर्ड सदस्यहरूमध्येबाट सन् २०२६–२०२७ का लागि पदाधिकारीहरू छानिएका छन्, जसमा अध्यक्षमा गार्डसिक्स नेपालका कन्ट्री डाइरेक्टर दीपेन चापागाईं, उपाध्यक्षमा योङ इन्नोभेसन्सका कार्यकारी अध्यक्ष विभूषण बिष्ट, महासचिवमा अलाया नेपालकी जेनेरल मेनेजर श्रेया श्रेष्ठ र कोषाध्यक्षमा जेस्पर आईटीका सीईओ सागर केसी रहेका छन् ।
कार्यसमितिका अन्य सदस्यहरूमा कैलाश राज विजयानन्द, नारायण कोइराला, पल्लव पराजुली, प्रार्थना साखः र सुब्रत ज्ञवाली निर्वाचित भएका छन् ।
यसपटकको साधारणसभा भोटेकोशी नदीमा आएको विनाशकारी बाढीका कारण उत्पन्न दुखद परिस्थितिलाई ध्यानमा राख्दै अत्यन्तै सीमित र औपचारिक रूपमा सम्पन्न गरिएको थियो ।
विपद्को अवस्थालाई मध्यनजर गर्दै नास-आईटीले यसअघि तय गरेका सबै उत्सवमय कार्यक्रमहरू रद्द गरी केवल संस्थाको वैधानिक र आधिकारिक कार्यसूचीलाई मात्र अगाडि बढाएको थियो ।
नवनिर्वाचित नेतृत्वले नेपालको प्रविधि उद्योगलाई विश्वव्यापी स्तरमा प्रतिस्पर्धी बनाउने र संस्थाको दीर्घकालीन दृष्टिकोणलाई प्रभावकारी रूपमा कार्यान्वयन गर्ने संकल्प गरेको छ । यसका लागि सरकार, शैक्षिक क्षेत्र, विकास साझेदार र अन्तर्राष्ट्रिय सरोकारवालाहरूसँगको सहकार्यलाई थप मजबुत बनाउने लक्ष्य लिइएको छ ।
पछिल्लो अध्यावधिक: भदौ २०, २०८३ ११:४५
