[ad_1]
सीके राउत र ममता झा ।
२७ फागुन, काठमाडौं । जनमत पार्टीका अध्यक्ष डा. सीके राउतले सत्तारुढ गठबन्धनकै निर्णयअनुसार आफ्नो पार्टीले उपराष्ट्रपति पदमा उम्मेदवारी दिएको बताएका छन् ।
शनिबार जनमत पार्टीको तर्फबाट उपराष्ट्रपतिमा ममता झाले उम्मेदवारी दर्ता गरेकी छन् । सो क्रममा संघीय संसद भवनमा पत्रकारहरुसँग कुरा गर्दै अध्यक्ष राउतले गठबन्धनभित्र उपराष्ट्रपतिका लागि ३ जनाको उम्मेदवारी दर्ता गर्ने र साझा उम्मेदवार बनाउनका लागि छलफल जारी राख्ने समझदारी भएको बताए ।
‘गठबन्धनकै निर्णय अनुसार तीनवटा उम्मेदवार मनोनयन गर्ने र पछिसम्म छलफल जारी राख्ने भन्ने कुरा आएको छ’ उनले भने, ‘…गठबन्धनमा कुरा मिल्नसक्छ । भोलिसम्म समय छ । मलाई पूरा विश्वास छ हाम्रो साझा उम्मेदवार हुनुहुन्छ, ममताजीकै पक्षमा निर्णय हुनेछ ।’
निर्वाचन आयोगले पनि उपराष्ट्रपतिमा महिला उम्मेदवार नै हुनुपर्ने आशय व्यक्त गरेको भन्दै राउतले आफूहरुको उम्मेदवारमा सहमति नजुटे मित्रवत प्रतिस्पर्धा गर्ने बताए । ‘हाम्रो उम्मेदवार सशक्त हुनुहुन्छ । संविधानको रक्षाको लागि तत्पर हुनुहुन्छ । कानूनी पृष्ठभूमिबाट हुनुहुन्छ । उहाँ योग्य हुनुहुन्छ हरेक दृष्टिकोणबाट । त्यही भएर उहाँले जित्नुहुन्छ भन्ने हामीलाई पूर्ण विश्वास छ । हाम्रो बटमलाइन भनेको मित्रवत प्रतिस्पर्धा हुन्छ’ उनले भने ।
जनमत पार्टीको तर्फबाट उपराष्ट्रपतिको उम्मेदवार ममता झाले संविधानलाई जीवित राख्नका लागि आफूले उम्मेदवारी दिएको बताइन् । उनले सबै जातजातिको राज्यको निकायमा प्रतिनिधित्व हुनुपर्ने संविधानको मर्म रहेको उल्लेख गर्दै मधेशी महिलाको तर्फबाट आफूले उम्मेदवारी दिएको बताइन् ।
‘एक महिला छ मधेशबाट आएको, संविधानको मर्मलाई जीवित राख्नको लागि, संविधानलाई जीवित राख्नको लागि यो उम्मेदवारी दिएको छु’ झाले भनिन् ।
सत्तारुढ गठबन्धनमै रहेको दल जनता समाजवादी पार्टीले रामसहायप्रसाद यादव र प्रमिला कुमारीलाई उपराष्ट्रपति पदको उम्मेदवार बनाएको छ । यसरी सत्ता गठबन्धनबाट ३ जना उम्मेदवार भएका छन् ।
नेकपा एमालेले भने अष्टलक्ष्मी शाक्यलाई उम्मेदवार बनाएको छ ।
[ad_2]
Source link
