राजेश हमालदेखि अस्मिता अधिकारीसम्मको प्रस्तुति रहने – Online Khabar


२० मंसिर, काठमाडौं । अघिल्ला दुई संस्करणको सफलतापछि गृष्मा ब्रोडकास्टिङ प्रालिले ‘सप्तरंग’को तेस्रो संस्करण आयोजना गर्ने भएको छ । सोमबार आयोजित पत्रकार सम्मेलनमा गृष्मा ब्रोडकास्टिङका प्रमुख गृहेन्द्र घिमिरेले देशका सातै प्रदेशमा कार्यक्रम गर्न लागिएको जानकारी दिए ।

आयोजकका अनुसार मंसिरको २४ गते पूर्वी नेपालको काँकडभिट्टाबाट शुरु हुने यो कार्यक्रम पुस ९ गते पश्चिम नेपालको पोखरामा पुगेर समापन हुनेछ ।

यो कार्यक्रम मंसिर २४ गते काँकडभिट्टा, मङ्सिर २६ गते जनकपुर, मंसिर २८ गते चितवन, पुस १ गते नेपालगञ्ज, पुस ३ गते सुर्खेत, पुस ५ गते धनगढी र पुस ९ गते पोखरामा आयोजना हुनेछ ।

कार्यक्रममा अभिनेता राजेश हमाल, गायक बद्री पंगेनी, प्रमोद खरेल, अनिल सिंह, हास्य कलाकारद्वय सन्दीप क्षेत्री र राजा राजेन्द्र, गायिकाहरु मिलन नेवार र अस्मिता अधिकारी, मोडल उषा उप्रेती सहभागी हुनेछन् । यस्तै नेपाल प्रहरीका ६ जना कलाकारको प्रस्तुति पनि कार्यक्रममा रहनेछ ।

कोरोना महामारीका कारण सुस्ताएको रंगमञ्चलाई यो कार्यक्रमको माध्यमबाट नयाँ गति दिने उद्देश्य रहेको गृष्मा ब्रोडकास्टिङका अध्यक्ष घिमिरेले बताए । कार्यक्रममा बोल्दै गायक बद्री पंगेनीले पहिलो पटक यो कार्यक्रममा सहभागी हुन पाउँदा खुशी लागेको बताए । कलाकार सन्दीप क्षेत्रीले देशभरका दर्शकलाई एकसाथ जोड्ने भएकाले पनि यो कार्यक्रम विशेष रहेको धारणा राखे ।

मोडल उषा उप्रेतीले आफू देशकै चर्चित कलाकारहरुसँग पहिलो पटक जोडिन लागेकोमा उत्साहित रहेको सुनाइन् । गायिका अस्मिता अधिकारीले पनि एउटा उत्कृष्ट कार्यक्रमका लागि आयोजकले छनोट गरेकोमा खुशी व्यक्त गरिन् ।

हास्य कलाकार राजा राजेन्द्रले आफूले दर्शकको स्वाद अनुसार हास्यरस पस्कने बताए ।

तस्वीर : श‌ंकर गिरी



Source link

यो खबर पढेर तपाईलाई कस्तो महसुस भयो ?
+1
0
+1
0
+1
0
+1
0
+1
0
+1
0
+1
0